Ang Kasaysayan ng Santo Rosaryo
Isinulat ni San Louis Marie De Montfort
Walang alinlangang masasabi na ang Rosaryo ang una at pinakamahalagang panalangin dahil binubuo ito ng Ama Namin, ang dasal ni Kristo, ng Aba Ginoong Maria, ang dasal ng pagbati ni Arkanghel Gabriel at iba pang karaniwang panalangin. Nagsimula ang pagdarasal ng Rosaryo noong panahon ng mga apostoles at ito ay dinarasal sa kasalakuyan.
Ang Rosaryo ay ibinigay sa simbahan ni San Dominic. Ito ay tinanggap niya sa Mahal na Birhen para sa pagbabalik-loob ng mga Albegensians at ng iba pang mga makasalanan. Nakita ni San Dominic na magiging lubhang mahirap ang mapabalik-loob ang mga Albegensians dahil sa mga napakabigat na kasalanan nila kaya inisip niyang magtungo sa kagubatan. Nagdasal siya rito ng tatlong araw at tatlong gabi nang walang tigil. Nagsakripisyo at tumangis siya upang mawala ang galit ng Panginoon. Dahil sa labis na pagpaparusa sa sarili, si San Dominic ay nagkasugat-sugat at nawalan ng malay. Sa oras na ito nagpakita si Birheng Maria na may kasamang tatlong anghel.
"Mahal kong Dominic, alam mo ba kung anong armas ang ibig ng Banal na Trinidad na gamitin para sa pagbabago ng mga tao sa daigdig?"
Sumagot si Dominic,
"Mahal na Birhen, mas alam ninyo ito kaysa sa akin dahil pumapangalawa kayo kay Hesukristo sa pagiging instrumento ng aming kaligtasan."
Ang Mahal na Birhen ay nagwika,
"Ibig kong malaman mo na sa ganitong digmaan, ang pinakamahalagang armas ay ang aking mga salmo na siyang bato ng Bagong Tipan; kaya kung ibig mong maabot ang mga tumigas nang kaluluwa at maipabalik-loob mo sila sa Diyos, ipangaral mo ang aking mga salmo."
Kapagdako'y tumayo si San Dominic na nasisiyahan at nagtungo sa katedral. Pinatunog ng mga anghel ang mga kampana upang tipunin ang mga tao. Si San Dominic ay nagsimulang mangaral. Bahagya pa lamang siyang nakapagsesermon nang magdilim ang araw. Sinundan ito ng bagyo at lindol na labis na ikinatakot ng mga tao. Lalo silang natakot nang makita nilang gumalaw ang larawan ni Maria na inilantad ni San Dominic. Tumingin ang Birhen sa langit at itinaas ang mga kamay nang tatlong beses upang manawagan sa Diyos sa pagbibigay ng kanyang parusa sa mga makasalanan kung sila ay hindi magbabalik-loob at hihiling ng kalinga sa Ina ng Diyos. Ninais ng Diyos sa pamamagitan ng mga di-pangkaraniwang pangyayaring ito, na lumaganap ang debosyon sa Santo Rosaryo sa buong mundo.
Pinagpatuloy ni San Dominic ang kanyang pangaral nang tumigil ang bagyo sa kanyang pagdarasal. Dahil sa napakahusay na pagpapaliwanag niya sa kahalagahan ng Rosaryo, halos lahat ng tao sa Toulose ay malugod na tinanggap ito at tinalikuran ang kanilang mga maling paniniwala. Tinalikuran din nila ang masasamang bisyo. Nagsimulang mamuhay sila bilang mabuting Kristiyano.
Dahil sa pagbibigay-sigla ng Espiritu-Santo, ng atas ng Mahal na Birhen at ng sariling karanasan sa pagsesermon, napalaganap ni San Dominic ang pagdarasal ng Santo Rosaryo hanggang sa huling sandali ng kaniyang buhay. Nangaral siya sa matataas at hamak na tao, sa mga iskolar at mangmang at sa mga Katoliko at erehe. Dinarasal noon ni San Dominic ang Rosaryo araw-araw bilang paghahanda na rin sa bawat sermon niya.
Ang Mahal na Birhen ay sumunod na nagpakita kay San Dominic sa isang kapilya sa Notre Dame, sa Paris habang dinarasal niya ang Rosaryo bilang paghahanda sa kanyang pagsesermon. Nagkataong pista noon ni San Juan na isa sa mga mangangaral ng ebanghelyo.
"Dominic, ang inihanda mong sermon ay maaaring mahusay, ngunit may dala ako na nasa aklat na mas mahusay kaysa sa iyong sermon," wika ng Mahal na Birhen.
Kinuha ni San Dominic ang aklat ng Mahal na Birhen, binasa nang mabuti at pagkatapos na mapagnilayan ito, nagpasalamat siya sa Mahal na Birhen.
Nang dumating ang oras ng pagsesermon, humarap si San Dominic sa kongregasyon na binubuo ng matataas na tao kaya naman sanay sila sa pakikinig ng mga sermong pambihira. Kasalungat ang ginawang pagsesermon ni San Dominic na ipaliwanag niya sa mga tagapakinig. Nangaral siya sa paraang madaling intindihin sa tulong ng Espiritu Santo. Ipinaliwanag niya ang Rosaryo na parang ang kaharap niya ay mga bata. Ginamit niya ang mga larawang guhit na nasa aklat na ibinigay ng Mahal na Birhen.
Sa isang pagkakataon, nagpakita si Hesus at ang Mahal na Birhen kay San Dominic upang siya'y himukin at bigyang sigla sa malawakang pagpapalaganap niya ng Rosaryo upang masugpo ang kasalanan at mapabalik-loob ang mga makasalanan at mapasampalataya ang mga di naniniwala sa Diyos.
"Dominic, nasisiyahan ako dahil hindi ka umaasa sa sarili mong karunungan at hindi mo inaasahan na purihin ka ng mga tao. Dakila ang kababaang loob mo sa paggawa para sa kaligtasan ng mga kaluluwa. Maraming alagad ng Diyos ang nagsisimulang mangaral tungkol sa kabigatan ng kasalanan. Dapat ay ihanda muna ang makasalanan sa pagkakaroon sa puso ng pag-ibig sa pagdarasal lalung-lalo na sa pagdarasal ng aking mga salmo, ang Diyos Ama ay hindi makatatanggi na magbigay ng kanyang grasya, kaya ibig kong mangaral ka sa pagdarasal ng Rosaryo, " wika ni Hesus.
Ang rosaryo ay mga katawagan nang Salmo ni Hesus at Maria noon pa mang panahon ni San Dominic dahil ang bilang ng Aba Ginoong Maria at salmo sa Aklat ng mga Salmo ni David at sa Rosaryo ay magkatulad. Ang mga walang pinag-aralan ay hindi makababasa ng mga salmo ni David kaya ang Rosaryo ang inihahalili para sa kanila.
Pinagtibay ng Mahal na Birhen ang pangalang Rosaryo sa dasal na ito. Ipinaalam niya sa ilang tao na tuwing darasalin nila ang isang Aba Ginoong Maria, binibigyan nila ang Birheng Maria ng isang magandang rosas. Ang katumbas naman ng pagdarasal ng isang dekada ng Rosaryo ay isang maliit na korona ng mga rosas, at ng buong Rosaryo, malaking korona ng mga rosas na inilalagay natin sa ulo nina Hesus at Maria.
(kuha sa librong Ang Bagong Rosaryo kasama ang Misteryo ng Liwanag)
Sa pamamagitan ng history ng Holy Rosary, mas lalo nating napatunayan kung gaano ka-powerful si Mama Mary sa buhay natin. Napakainteresting malaman kung paano nagsimula ang mga tao sa pagdarasal ng Rosaryo. Marami sa atin ngayon ang tumatalikod na sa Panginoon dahil sa mga problemang dumarating sa buhay nila. Pero kung magbabalik-loob lamang sila, sa tulong ni Mama Mary, siguradong gagaan ang problema nila at mabibigyan sila ng grasya.
Sa pamamagitan nitong isinulat kong ito, sana MARAMI na ang magbalik-loob sa Kanya. Huwag sana tayong mawalan ng pag-asa sa pagdarasal ng Rosaryo. Sana rin maging instrumento rin tayo para ipaalam sa iba. Wala namang mawawala di ba kung sasabihin natin sa bawat kakilala natin kung gaano kahalaga ang mga bagay na tulad nito. Isipin na lang natin ang buhay na walang hanggan na ipagkakaloob ng Diyos sa atin sa pagdating ng Tamang Panahon. Ang katawang tao, namamatay, nabubulok, pero ang kaluluwa natin ay nananatili. No one knows kung hanggang kelan ang buhay natin, kaya dapat ngayon pa lang, inihahanda na natin ang sarili natin.
mfrs
No comments:
Post a Comment